Este domingo chegará á Escola Naval Militar de Marín o buque máis moderno da Armada, o buque de Acción Marítima Audaz, que realizará unha escala para efectuar labores no Centro de Medidas Electromagnéticas.
Coincidindo con esta chegada, a escola celebrará unha xornada de portas abertas para poder visitar o buque. O BAM Audaz, atracado no peirao de Torpedos na Escola Naval, permanecerá dispoñible para visitas en horario de 10.30 a 13.30 e de 15.30 a 17.30 horas.
O Audaz, cuxa entrega á Armada tivo lugar o 27 de xullo deste ano, é o primeiro dos dous buques da extensión ao programa BAM da Armada construídos pola empresa española Navantia. O segundo buque desta extensión e sexto da serie, o Furor, será entregado á Armada en decembro deste ano.
O Audaz conta con 93,90 metros de eslora, cuberta de voo e un hangar para un helicóptero. Dispón do Sistema de Combate SCOMBA, e entre o seu armamento destacan unha montaxe de artillería de 76 milímetros e dous de 25 milímetros. Ademais, o Sistema Integrado de Control de Plataforma de última xeración, permite a súa operación cunha dotación reducida, concretamente 46 homes e mulleres.
As misións para as que se concibe o Buque de Acción Marítima son, por unha banda, de seguridade marítima en escenarios de baixa intensidade, con capacidade de disuasión e reacción ante ameazas asimétricas ou convencionais, e por outro, de protección dos intereses marítimos nacionais, colaborando coas forzas e corpos de seguridade do Estado e outros departamentos ministeriais, en misións de vixilancia, salvamento, axuda humanitaria, loita contra o tráfico ilegal ou loita contra a contaminación mariña.
