Os concellos de costa tiveron que empregarse a fondo para buscar un método viable á hora de controlar o aforamento nas súas praias, xa que a situación que se está vivindo pola pandemia da covid-19 así o require. Mentres que uns concellos restrinxiron o acceso aos turistas ou limitaron por zonas os areais, en Marín optaron pola modernización tecnolóxica.
Hai unhas semanas, o Goberno local marinense anunciou a creación da unha plataforma a través da páxina web do propio Concello na que se podía consultar o aforamento das praias a través dun semáforo virtual que alcanzaba catro niveis: baixo, medio, alto e completo.
Agora, un mes despois, a localidade marinense xa pode presumir de contar con semáforos físicos nas praias, que suscitaron moita expectación por parte dos turistas e veciños. Estes luminosos son outra forma de consulta de aforamento, que segue as mesmas directrices que a virtual, pero tan só con tres niveis: verde, ámbar e vermello.
Jorge Cajiao, desarrollador de The Lab&Co, empresa escollida para deseñar este sistema de control de aforamento, explica que a decisión de establecer uns semáforos físicos veu motivada "porque non todo o mundo ten un móbil con acceso a Internet ou non está habituado a consultar a través desas plataformas. Para facilitar o acceso á información decidiuse montar os semáforos físicos".
Pero, ¿realmente hai algunha diferenza entre os físicos e os virtuais? Non. Cajiao incide en que "a información recóllese desde o mesmo punto. Non hai ningunha diferenza. A única que podería haber é que ten tres luces no canto de catro como se podían ver no virtual".
A información que chega aos semáforos físicos solicítase a través dun computador de visión artificial e mapa de calor
A web mostra dous saltos intermedios, mentres que aquí unifícanse na cor ámbar típico dos semáforos de tráfico. Estes luminosos de praia están directamente conectados co servidor e vanse adaptando á mesma información que recibe a plataforma dispoñible na do Concello.
"Con isto non controlamos a xente que entra, senón a que está dentro da praia", sinala o desarrollador. Mentres que nalgúns lugares optaron por controlar o aforamento segundo a xente que entra, en Marín utilízase un sistema de mapa de calor a través dun computador con visión artificial para controlar o que pasa dentro das praias. Posteriormente esa información chega tanto á web como ao semáforo.
Con este método contrólanse por zonas os diferentes areais da localidade marinense e obsérvase en que lugar de cada praia concéntrase máis xente. "Ese mapa é dinámico e vaise actualizando segundo a xente que está en cada unha das zonas", que en cada praia é diferente. Por exemplo, a de Aguete ten 29, mentres que a de Portocelo, que é máis pequena, ten nove. "É moito máis práctico, xa que en praias como Aguete sérveche para saber en que zona aparcar", apunta Jorge Cajiao.
A disposición que ten a vía de praias de Marín facilita a consulta de información. Por ese motivo, "tamén se montou a pantalla LED. Aí vense os catro semáforos xuntos e poden decidir antes de chegar onde vas ou se te quedas nunha terraza a tomar algo. Damos a maior información posible", destaca Cajiao.
E é que The Lab&Co ten un core de negocio que se centra sobre todo na trazabilidade, que é o mesmo sistema que se utiliza no control das pragas. "Traballamos no sector da alimentación. Temos uns sistemas funcionando que a través de visión artificial facemos conteos, sobre todo no sector da pesca", explica Cajiao.
A empresa céntrase, por exemplo, no conteo do peixe que entra nos barcos. Os sistemas que define a entidade permite que o comprador de peixe, sexa unha gran superficie ou un particular, saiba que "o que está a comprar cumpre con todos os certificados, que se pescou de forma sostible, cando se pescou, como e en que condicións".
Ademais, a empresa marinense tamén traballa para estaleiros con proxectos de trazabilidade e seguridade. "Dámoslle un dispositivo a cada traballador e cando entran no estaleiro podemos saber onde está e telo controlado". Ademais, tamén existen sensores que, en caso de urxencia ou accidente, a empresa "poida saber cal foi a última localización do operario e incluso se ten pulso".
