O Concello de Marín móstrase consciente da importancia de preservar a contorna e a necesidade de establecer unha política e uns obxectivos ambientais para a protección e a prevención da contaminación na xestión das praias, posto que son un dos principais destinos turísticos da vila, así como unha obrigación en materia de preservación do medio ambiente.
Por este motivo, Marín ten implantado o sistema de xestión ambiental do Regulamento Comunitario de Ecogestión e Ecoauditoría, EMAS, nas súas praias e figura como entidade rexistrada no EMAS. Este é un instrumento recoñecido en todos os Estados membros da Unión Europea polo cal se permite que as organizacións se adhiran, con carácter voluntario, a un sistema comunitario de xestión e auditoría ambiental para avaliar e mellorar o seu comportamento ambiental e para difundir información pertinente ao público e outras partes interesadas.
Durante este mes de xullo, o Concello recibiu a auditoría anual externa na que son validadas as súas actuacións e as melloras conseguidas durante o ano anterior. Tamén se expoñen novos obxectivos para a nova campaña estival 2019. Isto é un paso necesario para o mantemento e a renovación da citada certificación ambiental, como aclarou o Concello da vila morracense.
Así, durante o 2018 e o que vai de 2019, as concellarías de Medio Ambiente e Praias traballaron na redución dos impactos ambientales asociados ao usufructo das praias do municipio e na mellora dos servizos ofrecidos nos areais.
Os indicadores do ano anterior mostran que aumentou a retirada de residuos en colectores fronte aos residuos retirados manualmente dos areais. Ademais, tamén se incrementou a cantidade de residuos retirados na bolsa amarela -destinada aos envases- fronte aos residuos de bolsa negra, onde se depositan orgánicos e outros non segregados. No entanto, o consumo de auga en duchas e billas aumentou debido, sobre todo, ao incremento de duchas e lavapés das praias e, á súa vez, do número de usuarios que visitan estes espazos marinenses.
O Concello explicou que non se trata só da calidade das augas, senón da limpeza dos areais, os servizos, os consumos responsables, a accesibilidade ou os métodos de traballo que minimicen os efectos ambientais da súa utilización polos usuarios. Segundo manifestou o Goberno local, tamén os usuarios deben ser os que axuden a protexer o medio ambiente e a reducir a contaminación nas praias e na contorna.
Por esta razón, tanto a concellaría de Turismo como a de Medio Ambiente traballan de forma conxunta para que os usuarios e as usuarias de Marín e as persoas que visitan o lugar se atope nun entorno "envexable", declarou o Concello.
Todos os anos defínense obxectivos e publícanse declaracións ambientais coas que se pretende facilitar ao público e a outras partes interesadas información ambiental do Concello de Marín e das melloras permanentes alcanzadas no contexto ambiental das praias.
