Paliar a falta de aparcadoiro en Marín é un dos retos que ten ante si o Goberno local, que decidiu emprender unha rolda de contactos cos propietarios das parcelas que están sen edificar na contorna do centro urbano, co fin de chegar a un acordo a través do cal cedan o seu uso ao Concello para que utilice os terreos como aparcadoiros disuasorios.
Segundo explicaron este venres fontes municipais, esta medida xurdiu por mor da coincidencia no tempo de varias obras "que levan consigo a ocupación da vía pública, reducindo notoriamente os aparcadoiros", que son as do proxecto do novo emisario na Avenida de Ourense e as humanizacións da Rúa Inferniño e de Concepción Areal, que se comezará a executar proximamente. Outro dos motivos que levou ao equipo que dirixe María Ramallo a tomar a decisión de solicitar a propiedade das parcelas son as denuncias veciñais que con certa frecuencia reciben pola escasa limpeza das mesmas.
No caso de que os donos das leiras accedesen a chegar a un acordo coa Administración local, estudaríase unha cesión dos terreos na que o Concello gozaría dunha cesión temporal, "sen que esta supoña diminución ou limitación dos seus dereitos como titulares das parcelas referidas", aclara o Goberno municipal. A duración de acordo fixouse nun ano, aínda que, se ambas as partes considérano, prorrogaríase de forma automática ata cumprir unha década de vixencia do convenio. O Concello faríase cargo da limpeza e o mantemento dos terreos e xa se mantiveron contactos cos propietarios das parcelas situadas nas rúas Quevedo, República Arxentina, Concepción Areal e Inferniño.
