Un total de 80 establecementos de hostalería uníronse esta semana á campaña Ecohosteleiro, de Ecoembes. A iniciativa, financiada pola Xunta de Galicia, ten por obxectivo animar aos bares e restaurantes a reciclar de forma sostible e respectuosa, os residuos destinados ao colector amarelo que producen diariamente.
Con tan só cinco días en marcha, a campaña de reciclaxe conseguiu superar as súas expectativas de participación e xa conta con 80 locais de hostalería de Marín e Seixo adscritos. A través desta campaña, Ecoembes pretende incentivar a separación dos plásticos e aluminios destinados ao colector amarelo nun sector onde detectaron unha alta taxa de desinformación en canto ao proceso de reciclaxe.
"Centrouse na hostalería porque xera unha alta porcentaxe deste tipo de residuos inertes e onde non hai normalmente tanta concienciación de reciclaxe como ocorre no ámbito doméstico", explica o encargado da campaña en Marín, Alberto Pesqueira.
Algúns dos motivos polos que a reciclaxe neste sector non é tan habitual son a falta de espazo ou de medios para levalo a cabo, engade.
Por iso, co fin de facilitar a tarefa e promover a separación, Ecoembes proporcionará a todos estes locais un cubo que variará de tamaño dependendo das necesidades do local. Tamén se lles fai entrega dunha chaqueta de cociñeiro e dun adhesivo que lles recoñece como un establecemento concienciado co medioambiente.
SEGUIMENTO
Ademais, todos os Ecohosteleiros entran tras adherirse ao programa nunha base de datos que permitirá a Ecoembes realizar un seguimento do seu progreso.
Deste xeito, nun período de cinco días tras recibir o cubo, levará a cabo unha visita de control para determinar se se está realizando correctamente o proceso e resolver calquera dúbida que poida xurdir.
Esta campaña, baixo a lema De propina unha segunda vida ao reciclar implementouse en Galicia este mes de xullo e xa está en marcha en varios concellos da comunidade autónoma.
