O Concello de Marín porá en marcha nos próximos días unha serie de actuacións para o acondicionamento e a mellora dos parques infantís do núcleo urbano da vila e o rural. O obxectivo, segundo manifestou o Goberno local, é permitir un maior goce destes espazos de recreo.
O parque natural de Cotorredondo, xunto ao Lago de Castiñeiras, será un dos beneficiarios desta reforma, debido a mal estado dos elementos de xogos infantís. Para iso, actuarase en dúas zonas de recreo diferenciadas.
A primeira actuación no Lago de Castiñeiras realizarase en terreos da Comunidade de Montes de San Xulián. Alí, construirase un conxunto de equilibrio multiaventura, unha tirolina e un pórtico de randeeira dobre. Esta actuación débese ao mal estado de conservación dos elementos e por non estar adaptados á normativa en vigor, segundo explicou o Concello.
A segunda reforma recae na Comunidade de Montes de Santo Tomé de Piñeiro. Nesta zona, levará a cabo a instalación dun equipo combinado, un pórtico de randeeira e balancines de peirao.
Todos os elementos novos estarán fabricados en aceiro galvanizado e pintados en cor madeira. A Casa Consistorial declarou que todas as reformas cumprirán coa normativa vixente en canto a seguridade de parques infantís.
Para a superficie amortiguadora de impactos optarase pola creación de caixóns cunha profundidade de 30 centímetros, delimitados por taboleiros de madeira tratada e recheos de cortiza de piñeiro.
A primeira zona terá unha superficie de actuación aproximada de 1.300 metros cadrados, debido á lonxitude da tirolina, e a segunda zona será de 500 metros cadrados.
O Concello fixo fincapé en que todos os elementos serán integradores co medio natural no que se atopen, "sendo os novos elementos de materiais duradeiros, antivandálicos e de pouco mantemento", engadiu o Concello.