O responsable dunha das cafeterías do Porto de Marín, situado na planta baixa do antigo edificio administrativo da Autoridade Portuaria, denunciou o roubo de ao redor de 600 euros do interior do local. Ao parecer, e segundo consta na denuncia que o propietario interpuxo na Policía Nacional, entre as 17.00 horas do 4 de xaneiro e as 18.30 do día 6, momento no que o propietario accedeu ao local, alguén forzou a rexistradora e a máquina comecartos, facéndose cun botín duns 600 euros.
No entanto, segundo indica a Policía Nacional, os accesos ao inmoble non foron forzados, isto é, nin as portas nin as fiestras. Tampouco a máquina de tabaco.
A Policía Nacional investiga a denuncia e a Policía Científica xa acudiu á cafetería da rada marinense para obter probas que permitan identificar ao ladrón e esclarecer o roubo.
Por outra banda, usuarios do Porto indicaron a este diario que o pasado fin de semana produciuse tamén o roubo dun carretillo elevador. De feito, debido ás dimensións do vehículo, as mesmas fontes non comprenden como puideron os presuntos responsables do roubo sacar o carretillo da zona portuaria sen ser vistos. Así mesmo, denuncian que moitos dos usuarios da rada conviven cunha situación de inseguridade permanente debido a uns feitos que non consideran illados, pois, aseguran, non é a primeira vez que ocorren sucesos similares.
Por iso, estas persoas entregaron no Rexistro da Autoridade Portuaria unha petición de reunión co seu presidente, José Benito Suárez Costa, para tratar esta situación de inseguridade e buscar solucións. E é que tras estes roubos, estas persoas temen que as súas vidas poidan correr perigo, sobre todo durante a noite, cando hai moita menos xente no recinto e a iluminación é insuficiente.
A Autoridade Portuaria confirmou que recibirá a estes usuarios e analizará calquera inquietude que haxa sobre o tema para intentar mellorar no que sexa necesario.
De todos os xeitos, este martes aínda non estaba fixada a data na que se celebrará o encontro.
Con todo, a Autoridade Portuaria desmentiu o martes estas afirmacións, indicando que recentemente se incrementou o número de cámaras de vixilancia. Así mesmo, sinalou que hai pouco se reformou o circuíto pechado de televisión.
Segundo explicaron os responsables da rada, os dispositivos de vixilancia instalados na zona caracterízanse por ser cámaras Demo, isto é, pequenos aparellos que gravan en 360 graos e que son dificilmente detectables a primeira vista polas persoas. "Hai cámaras por todo o Porto", puntualizou a Autoridade Portuaria, que considera que o Porto está ben vixiado.
