Rodrigo Nogueira, máis coñecido como o Don Juan de Marín, foi detido en Madrid para ingresar en prisión, segundo informa este martes La Sexta. O Xulgado do Penal número 1 de Burgos condenouno a 18 meses de prisión por lesións e malos tratos no ámbito familiar.
O pasado mes de xaneiro, o programa Expediente Marlaska localizouno na serra de Madrid, onde traballa nun restaurante.
Nogueira acumula tres sentenzas por enganar e estafar a medio centenar de mulleres de toda España para obter diñeiro. Coñecía ás súas vítimas a través de páxinas de contacto e redes sociais.
ESTAFA EN MEAÑO. O pasado mes de agosto, a Audiencia Provincial de Pontevedra confirmou a condena imposta a Nogueira Iglesias por estafa así como á que era a súa parella cando cometeu o delito, Olga G.C. Os dous foron procesados por deixar unha débeda de 5.062 euros nun hotel de Meaño.
