Un veciño de Marín foi detido na mañá do venres nunha sucursal bancaria do centro da vila. Os feitos ocorreron pasadas as 12.30 da mañá, cando o individuo entrou no banco para levar a cabo algún tipo de xestión. Por motivos descoñecidos, o home comezou un duro intercambio de palabras co persoal da entidade, mostrando, finalmente, unha actitude chulesca e incluso agresiva. Por iso, os traballadores decidiron alertar á Policía Nacional, que pouco despois se presentou na sucursal con dous coches patrulla e varios axentes. Segundo testemuñas, lonxe de reducir o seu comportamento, o individuo continuou a discusión coa policía, chegando incluso a ter un pequeno forcexo que lle valeu o seu apresamento.
Con todo, cabe destacar que, tras a detención, o individuo abandonou a zona nunha ambulancia que se achegou ao lugar do suceso, e non nalgún dos coches patrulla que se achegaron alertado polos traballadores bancarios.
Segundo fontes próximas ao caso, non é a primeira vez que o detido é arrestado por unha patrulla de axentes por motivos similares ao acaecido na mañá do venres na vila marinense.
CONFUSIÓN INICIAL. O acontecemento foi seguido por multitude de veciños da localidade que se achegaron sorprendidos polo despregamento da policía. A pesar de que nun primeiro momento se falou da posibilidade de que fose un atraco, fontes próximas á investigación do caso confirman que en ningún momento houbo por parte do detido unha intención de subtracción e, moito menos, que empregase o uso dalgún tipo de arma dentro da sucursal.