O documental sobre a vida do boxeador marinense Aarón González é case unha realidade. Devolviendo el golpe, título da peza audiovisual dirixida polo director e xornalista marinense Carlos Pampín, inicia mañá unha campaña de micromecenazgo para conseguir o financiamento que falta para a postproducción e a estrea do documental.
"Non se trata de darnos diñeiro así porque si, a fondo perdido. Por cada achega, o mecenas recibirá unha recompensa, desde que o seu nome apareza nos títulos de créditos do documental, ata asistir á estrea no cine Seixo de Marín, ou recibir clases particulares de iniciación ao boxeo con Aarón, o campión galego e de España", asegura o director e guionista, Carlos Pampín.
Será na plataforma web, Verkami, onde se poderán atopar as recompensas e os premios por colaborar con Devolviendo el golpe. O prazo estará aberto durante un mes para alcanzar a meta marcada e conseguir todos os patrocinadores posibles. O diñeiro obtido utilizarase para financiar a postproducción do documental sobre Aaron González. Ademais, a maioría das recompensas son acumulativas, canto máis se invista, máis cousas se obterán.
"Sabemos que non é o momento idóneo porque a situación coa covid-19 é moi complicada e hai moita xente que o está pasando mal, pero creo que esta historia de Aarón e a súa familia pode servir de exemplo de superación, que temos que seguir adiante e que, por mal que vaian as cousas, non hai que tirar a toalla e levantarse da lona, como fixo Aarón. Este documental pode inspirar a moita xente", anota Pampín.
Os interesados poderán achegar desde 10 ata 45 euros e segundo a cantidade se obterán diferentes recompensas, desde saír nos títulos de créditos do documental, ata un pack con diferentes premios.