O buque escola da Armada española Juan Sebastián de Elcano adentrarase o vindeiro sábado ao mediodía en augas marinenses. Coa súa chegada, 70 guardiamarinas pertencentes á 421ª promoción do Corpo Xeral e 151ª de Infantería de Mariña porán fin ao XCI Cruceiro de Instrución no que se embarcaron o pasado 13 de xaneiro no Porto de Cádiz. Desde ese momento, o Elcano asucou as augas de Estados Unidos, Colombia, México, Cuba, Portugal, Alemaña ou Polonia, entre outros.
Os guardiamarinas do Corpo Xeral e Infantería de Mariña realizaron a bordo do buque escola da Armada parte do seu plan de estudos do terceiro curso de carreira, cursando, entre outras, materias de Navegación, Astronomía, Meteoroloxía, Táctica Anfibia, Seguridade e Protección e Manobra. Ademais de formarse profesionalmente, segundo explica a Escola Naval Militar, a realización do cruceiro fomenta un importante desenvolvemento das relacións persoais, "pola estreita convivencia que se respira a bordo durante a viaxe".
O buque, ao mando do capitán de navío Ignacio Paz García, conta cunha dotación formada por 22 oficiais, 20 suboficiais, 136 militares da escala de Mariñeiría e Tropa, un profesor universitario e dous mestres civís.
Así, o Elcano regresa a Marín logo de dous anos para participar nos actos do Día do Carmen. E é que o ano pasado o buque escola non chegou a tempo para participar no peche do curso escolar debido á maior duración da viaxe do cruceiro de instrución dese ano.
Así, con numerables experiencias e desafíos debaixo do brazo, os 70 guardiamarinas serán recibidos polos seus familiares e amigos entre bágoas, abrazos e palmadas nas costas.
O bergantín goleta da Armada Española Juan Sebastián de Elcano será recibido, no Peirao Torpedos, ás 13.15 horas, polo comandante-director da academia naval, Ignacio Cuartero, polo batallón de alumnos e pola Banda de Música da Escola, ademais dos familiares e amigos da dotación e dos guardiamarinas embarcados.
Aínda que a chegada do Elcano é un acto estritamente militar, a Escola Naval Militar ofrecerá a posibilidade de que todas aquelas persoas que o desexen poidan coñecer de primeira man o primeiro barco que deu a volta ao mundo.
Deste xeito, o domingo, 14 de xullo e o martes 16, Día do Carmen, celebraranse xornadas de portas abertas en horario de 16.00 a 20.00 horas para todas aquelas persoas que queiran visitar o buque escola Juan Sebastián de Elcano.
REAIS DESPACHOS. Por outra banda, o Ministerio de Defensa confirmou este mércores que o rei Felipe VI
Así, Felipe VI, cuxa instrución militar incluíu unha estancia na academia naval, regresa así á Marín tras non estar presente por motivos de axenda na cerimonia de 2018.
De momento, ningunha outra autoridade política ha confirmado a súa asistencia a este emblemático evento da Escola Naval Militar, que porá o broche de ouro ao curso 2018-2019.
