Os actos solemnes de entrega de Reais Despachos e Xura de bandeira volverán celebrarse de forma conxunta nunha xornada única que, de novo este ano, non contará coa presenza de ningún membro da familia real. Quen si estará será a ministra de Defensa, Margarita Robles, encargada de presidir os actos solemnes. O centro castrense, ademais, volverá programar a celebración destes actos, que comezarán ás 10.30 horas, coincidindo co día da Virxe do Carme este venres.
Deste xeito, na tradicional Xura de Bandeira deste ano participarán 79 alumnos aspirantes, dos que 13 son mulleres, a Oficiais do Corpo Xeral (63) e do Corpo de Infantería da Mariña (16). Por outra banda, farase entrega dos Reais Despachos a 111 novos Oficiais -dez mulleres- dos Corpos Xeral (61), Infantería da Mariña (13), Intendencia (16) e Enxeñeiros (21) da Armada.
Entre os futuros oficiais que reciben despachos este curso atópanse oito alumnos estranxeiros de Tailandia (1), Arabia Saudita (5) e Catar (2).
No acto, ademais da ministra de Defensa, tamén participará o Almirante Xefe de Estado Maior da Armada, Almirante Xeral Antonio Martorell Lacave.
De novo este ano, debido a que persiste a situación sanitaria ocasionada pola covid-19, o acto desenvolverase baixo estritas medidas hixiénico-sanitarias por prevención e seguridade. En formación estarán unicamente os alumnos dos cursos que xuran bandeira e os que reciben os seus despachos de oficial, respectivamente. Ambos os actos desenvolverase ante a presenza dun reducido número de invitados, xa que cada alumno tan só poderá traer a dous invitados.
CUARTERO. O deste venres será o último acto oficial no que participe o actual director da Escola Naval Militar, Ignacio Cuartero, que o próximo 27 de xullo pechará a súa etapa á fronte do centro castrense e incorporarase ao Estado Maior da Armada en Madrid.
Cuartero será substituído a finais deste mes polo capitán de fragata ferrolán Pedro Cardona Suanzes, que deberá ascender a capitán de navío antes de porse á fronte do centro castrense de Marín.
