Catro persoas resultaron feridas na tarde deste venres nun accidente de tráfico rexistrado en Cangas, en Coiro, onde o vehículo no que viaxaban se saíu da vía e chocou contra un muro. O sinistro rexistrouse á altura do número 12 da Rúa do Carballal.
Atendendo ao relato das testemuñas que alertaron á central do 112 sobre as 18.00 horas, os catro ocupantes do vehículo saíron del pero necesitaban asistencia sanitaria. Mobilizouse o 061 e a Policía Local, ademais de alertar á Garda Civil de Tráfico, aos Bombeiros do Morrazo e Protección Civil.
COLISIÓN MÚLTIPLE NO PORRIÑO. Non foi o único sinistro rexistrado na tarde do venres na provincia de Pontevedra. O 112 recibiu sobre as 18.30 horas a alerta doutro accidente rexistrado na A-55 no Porriño, con tres vehículos implicados. Ocorreu na saída 15A, dirección Vigo.
Protección Civil confirmou que había dous feridos e que foron trasladados ao Hospital Álvaro Cunqueiro de Vigo.