As máis de 500 pezas arqueolóxicas do arquivo municipal do Museo Manuel Torres xa están catalogadas. O arqueólogo Juan Castro, de Anta da Moura, fixo entrega este xoves ás edís Beatriz Rodríguez e Cristina Acuña, do informe no que se detalla o inventario completo destes tesouros históricos.
As labores de catalogación destas pezas deron comezo o pasado mes de febreiro e tiñan por obxectivo coñecer exactamente a procedencia de cada unha delas e ordenalas para poder facilitar a súa conservación e a súa futura consulta a investigadores. Todo o material foi clasificado por categoría ou tipoloxía coa vista posta en expolas nun futuro.
Castro aclara que as pezas inventariadas "proveñen de distintas partes do Concello vinculados a xacementos arqueolóxicos, pero que non teñen que ver con excavacións arqueolóxicas, senón que foron achegas de veciños e demáis que aparecían ao longo do tempo" e que se gardaban inicialmente na Biblioteca, antes de pasar aos fondos do museo.
A importancia destes achados radica principalmente na información que proporcionan sobre algunhas das épocas da historia da localidade, desde o Paleolítico ata a actualidade. "Era imprescindible clasificar estas pezas, inventarialas e teas en condicións de ser consultadas polos investigadores que teñan interese", sinala o experto.
Entre o medio milleiro de elementos catalogados, destaca sobre todo o material cerámico, a pedra e os metais. Con todo, tamén se puideron inventariar pezas de alta relevancia, como uns restos romanos que, aínda que non teñen contexto arqueolóxico, explica Castro, "son moi interesantes". Achados en Portocelo, son a proba de que "debían pertencer probablemente a un antigo asentamento romano que debeu existir por esa zona".
De procedencia romana tamén se puido documentar unha ánfora, que apareceu no mar practicamente completa e que se pode ver xa no museo, así como varios fragmentos de muíños circulares típicos dos castros ou varias anforetas da India.