O ansiado acordo pesqueiro entre a Unión Europea e Mauritania será debatido entre os puntos do día da sesión ordinaria do Comité de Ministros do Consello de Europa o vindeiro luns.
A súa entrada nesta reunión podería supor o empuxón definitivo para que o documento se firme no prazo acordado e a flota pesqueira que ten actividade no caladoiro africano non teña que deter a súa actividade en novembro, coa finalización da segunda e última prórroga agora en marcha.
O que é o maior acordo de pesca de Europa afecta a decenas de empresas, entre elas seis buques de fresco de Marín e outros barcos conxeladores da comarca do Morrazo. Logo de sete roldas de negociacións, o ansiado documento atópase aínda en proceso de ser aprobado, a tan só uns meses de que venza o prazo.
Ante a inexistencia dun novo acordo, púxose en marcha unha prórroga do anterior, que ten como prazo máximo dous anos, vencendo o próximo mes de novembro sen posibilidade de ser renovada. De non dispor dun acordo antes desta data, as empresas deberán deter a súa actividade por completo á espera de que se aprobe o acordo necesario.
Cuns meses aínda por diante, os armadores marinenses móstranse preocupados ante o lento proceso, que require dunha marxe de tempo para poder realizar todos os trámites administrativos pertinentes.
A estas dificultades temporais que a covid-19 acentuou con roldas de negociacións atrasadas e un proceso máis lento, súmase a intención da Unión Europea de reducir a contraprestación económica a Mauritania.
Unha decisión que non aproba o país africano e que o organismo europeo xustificou cun desaproveitamento das posibilidades de pesca do caladoiro, explica a armadora marinense María José de Pazo. "Isto non sucede coa nosa flota", engade a empresaria que insiste en que esta decisión "é un erro".
Esta suma económica é un pago por pescar en augas mauritanas, pero ten tamén uns fins sociais de formación pautados pola UE, sinala a armadora. A maiores desta cantidade, as empresas armadoras deben abonar un canon de pesca por todo o capturado, que se une a unha serie de requisitos que todas as flotas europeas deben cumprir.
A entrada do acordo o vindeiro luns na sesión ordinaria do consello pode ser "o empuxe definitivo para a firma do acordo". Se o luns se decide apoiar o desbloqueo desa contrapartida económica que a UE quere reducir, a sétima rolda de negociacións prevista para a próxima semana, "podería ser a última".
No caso de que se ratifique esa redución da contraprestación, o acordo continuaría en negociacións co risco de non chegar a tempo antes da finalización da prórroga.
Entre as consecuencias de que isto suceda, De Pazo explica que a sustentabilidade das augas do caladoiro está en risco. A paralización da flota europea suporía un posible aumento de barcos extracomunitarios que non cumpren coas mesmas medidas de sustentabilidade que esixe a Unión Europea.