A aprobación do Plan Xeral de Ordenación Municipal no ano 2012 propiciou que dous furanchos que exerceran a súa actividade en Marín desde anos antes tivesen que deixar de vender os seus excedentes dos seus cultivos vinícolas a todas aquelas persoas que desexasen gozar dunha boa copa de viño caseiro a bo prezo e acompañada dunha tapa.
E é que lugares eminentemente rurais ou semirurais foron catalogados polo PXOM como urbanos, a pesar de que a práctica indica todo o contrario, restrinxindo a actividade dos furanchos a aquelas vivendas que se atopan situadas sobre chan rústico.
Foi por este motivo polo que a Asociación de Furancheiros de Marín solicitou ao Concello un cambio na ordenanza para que puidesen aproveitar todo o sobrante do viño producido polas súas vides. Así, o pasado 19 de febreiro entraba en vigor a nova normativa que permitía a venda de viño a todas aquelas persoas que o fixeron sempre.
A edil de Turismo asegura que haberá máis furanchos que se dean de alta para vender os seus excedentes de viño antes do 30 de xuño
"A día de hoxe hai dez furanchos autorizados para exercer a súa actividade, e dentro deses dez están incluídos eses dous furanchos de toda a vida, que levaban uns anos sen poder estar dados de alta porque o chan onde estaban situados cambiou a clasificación", indicou a concelleira de Turismo, Cristina Acuña, que se referiu á nova normativa como "positiva porque se pode ampliar o número de sitios onde se realiza a actividade". De feito, os furanchos "teñen moita afluencia, é unha actividade que move xente", afirma.
De todos os xeitos, o prazo para poder solicitar exercer a súa actividade está aberto ata o 30 de xuño, polo que a edil asegura que máis establecementos deste tipo daranse de alta para poder vender os seus excedentes vinícolas. "Hai algúns que solicitan todos os anos darse de alta que aínda non o fixeron", apunta Acuña.
"Só poden abrir durante ese período para non prexudicar á hostalería", sinala a edil de Turismo, que explica que non todos os furanchos son iguais. "Uns teñen adega, outra barra, outro alpendre... o que implica que abran antes ou despois. Hai algúns que prefiren exercer a actividade cando estea mellor tempo, e inclínanse máis cara aos últimos meses", conclúe.
