O EEI Nosa Señora do Carme inaugurou este martes as representacións teatrais que o Concello de Marín puxo en marcha para pór en valor a figura de Gago de Mendoza. Así, os máis pequenos do centro escolar participaron co corsario marinense nun pequeno conta contos no que puideron coñecer a traxectoria dunha das figuras históricas máis importantes da vila.
A iniciativa, que conta co apoio da Deputación de Pontevedra, levou a cabo tamén a elaboración dun cómic que ilustra a vida de Mendoza e que todos os alumnos recibirán como recordo da visita do corsario.
Unha actividade que tamén puideron gozar os máis pequenos do EEI O Grupo. Este xoves será a quenda do CPR A Inmaculada, ás 10.30 horas, e a semana que vén continuarán o luns ás 10.00 horas no CPR San Narciso e no Ceip Sequelo ás 12.30 horas.
Esta proposta, que acerca de xeito didáctico e entretido a historia de Gago de Mendoza, conta cun gran éxito entre o alumnado, destacou a concelleira de Cultura Itcíar Álvarez.
O obxectivo principal é facer chegar aos novos marinenses o papel do corsario na liberación da vila no ano 1809 durante a Guerra de Independencia Española.
