Seis membros dunha familia, dous adultos e catro menores, tiveron que ser atendidos por intoxicación por monóxido de carbono a causa do mal funcionamento dun aparello de calefacción no seu domicilio.
O suceso ocorreu sobre a 1:00 horas da madrugada deste sábado en Moaña, nun inmoble de dúas plantas situado no lugar de Couso, na parroquia de Santa Eulalia de Meira, próximo á vila.
Segundo indica o servizo de urxencias 112, un dos membros da familia contactou con este servizo para indicar que acudira ao centro de saúde, xunto con outros tres familiares, con síntomas de intoxicación por monóxido de carbono. Ademais, indicaba que no domicilio quedaran outras catro persoas.
O servizo 112 alertou de inmediato a Urxencias Sanitarias de Galicia-061, aos Bombeiros do Morrazo e a empresa subministradora de gas. Ata o lugar do suceso acudiron tamén axentes da Garda Civil e da Policía Local de localidade moañesa.
Os servizos de urxencias procederon a ventilar a vivenda tras confirmar que as medicións realizadas tras o aviso resultaron positivas en ambas as plantas do inmoble.
Finalmente, outros dous membros da familia, ambos os menores de idade, tiveron que ser evacuados polos servizos sanitarios con síntomas de intoxicación.
Algúns dos signos máis frecuentes que aparecen tras respirar monóxido de carbono son dor de cabeza, mareos, náuseas e visión borrosa.
