Dous adultos e catro menores, todos membros da mesma familia, resultaron afectados por intoxicación por monóxido de carbono a causa do mal funcionamento dun aparello emisor de calor, en Moaña.
Segundo a información facilitada ao 112 Galicia polos equipos de intervención que acudiron ao lugar dos feitos, unha estufa e un quentador puideron ser as causas da acumulación nociva de gas no inmoble de dúas plantas situado no lugar de Couso, na parroquia de Santa Eulalia de Meira.
O incidente tivo lugar ás 01:00 horas deste sábado. Neste momento, un dos membros da familia contactou co 112 Galicia para informar que acudira ao centro de saúde, acompañado doutros tres familiares, todos con síntomas de intoxicación por monóxido de carbono. No seu relato, a persoa afectada indicaba que no domicilio quedaron outras catro persoas.
De inmediato, os xestores do Centro Integrado de Atención ás Urxencias (CIAE) puxeron os feitos en coñecemento dos profesionais de Urxencias Sanitarias de Galicia-061, dos Bombeiros do Morrazo e da empresa subministradora de gas. Ata o lugar tamén acudiron axentes da Garda Civil e da Policía Local.
Unha vez no domicilio, os membros do Servizo de Prevención Extinción de Incendios e Salvamento procederon a ventilar a vivenda tras confirmar que as medicións resultaron positivas en ambas as plantas do inmoble. Así, outros dous membros da familia, menores de idade, foron evacuados polos servizos sanitarios tamén con síntomas de intoxicación.
