Miércoles. 21.11.2018 |
El tiempo
Miércoles. 21.11.2018
El tiempo

José Casals: "Un bo chef debe saber onde nace o produto e como chega ás súas mans"

Algún dos alumnos e profesores, na planta do Percebeiro. DP
Algún dos alumnos e profesores, na planta do Percebeiro. DP

A empresa e-Spain organiza viaxes para estudantes de cociña americanos que queiran descubrir que e como se come lonxe das súas casas

Seguro que en Seattle ou en Miami non faltan cousas que ver e degustar, pero se un cociñeiro quere facer viaxar aos seus comensais a través das súas creacións culinarias, ten que ser primeiro el o que emprenda rumbo cara a outras culturas gastronómicas. Esta filosofía é a que rexe a empresa e-Spain, que organiza viaxes por España, Francia e Reino Unido para estudantes de cociña americanos que queren descubrir que se come e como se cociña máis aló do océano.

Logo de mariscar coas mariscadoras de Combarro e de visitar a planta agricultora da Rosaleira, doce estudantes e dous profesores das dúas cidades estadounidenses mencionadas desembarcaron no Percebeiro, no Porto de Marín, para coñecer os peixes e mariscos que se pescan na ría e que acaban nos pratos de todos os restaurantes do mundo.

Manuel Otero, director da firma comercializadora, fixo de mestre de cerimonias desta visita, na que explicou aos futuros chefs as bondades da pesca artesanal galega e os procesos de depuración e distribución que levan a cabo nas instalacións que a empresa ten en plena lonxa marinense. Precisamente esa parte foi a que máis atraeu aos estudantes, que ademais de coñecer especies das que nunca antes ouviran falar, como o ameixón ou a ortiguilla, puideron comprender como os alimentos chegan ás despensas.

"Un bo chef ten que coñecer de onde vén o produto, onde nace, como se comporta e como chega ás súas mans. É un proceso moi importante, porque nós temos que ver cales son as diferenzas na calidade e que é o que lle estamos dando ao cliente", asegura José Casals, un dos profesores que acudiu á visita á rada marinense.

Un dos alumnos participantes na iniciativa, Miguel Arbelo, coincide en que coñecer os procesos é vital. Alí, por exemplo, a conserva asóciase a un alimento de pouca calidade, "e aquí con todo é todo o contrario". Miguel afirma que "ver como a xente se relaciona aquí coa materia prima" é o mellor que leva e di que lle gustaría probar a cociñar bogavante.

O tour dos alumnos terminou cun showcooking nas oficinas do Percebeiro a cargo do chef Iñaki Bretal, integrante do Grupo Nove.

José Casals: "Un bo chef debe saber onde nace o produto e como...
Comentarios