No caso do lavadoiro do Río Casás levou a cabo a renovación da cuberta polo "forte impacto visual que tiña a anterior, xa que os materiais empregados na súa construción non permitían unha boa integración paisaxística", explica o concelleiro de Medio Rural, Pablo Novas, que visitou onte o lugar para comprobar o resultado final. O conxunto etnográfico atópase agora moito máis integrado na súa contorna, explican desde o Concello.
Esta revalorización forma parte dun conxunto de actuacións que o Goberno local está a levar a cabo nestes espazos, como a sinalización dos máis de 60 lavadoiros existentes no municipio. O obxectivo, destacan fontes municipais, é que este patrimonio histórico, unido á auga e a hixiene recupere parte do valor que perdeu coa chegada dos avances tecnolóxicos.
Con esta iniciativa, que leva en marcha desde principios de ano, instaláronse carteis nos accesos de cada un destes enclaves, así como o topónimo onde se sitúan. Tamén se levaron a cabo actuacións de limpeza e mantemento.
Ademais, para integralos adecuadamente na contorna, empregáronse materiais sostibles, como a madeira.
Algúns dos lavadoiros que contan xa con esta sinalización son os de Pedreiras, Mogor, Redón, Don Pedro, Leira de Briz, O Souto, Carregal, Os Bravoso, Outeiro, O Cañoto, Bagüín, O Outeiro, Fonte do Castiñeiro, Cidrás, Moreira, Pardavila, Casal ou o de Aguete.
PÁGINA WEB. Doutra banda, o concelleiro de Medio Rural avanzou esta semana que xa se está traballando na creación dunha páxina web específica para os lavadoiros da localidade.
Unha plataforma na que se poderán consultar todos estes enclaves, así como ver fotografías e unha explicación detallada da súa orixe e localización.
Segundo informan desde a Concellería de Medio Rural, o espazo web atópase nestes momentos no proceso de documentación, fotografando cada un dos lavadoiros e dotando de contido a cada ficha técnica.