O Consello da Xunta aproba o comezo das expropiacións necesarias para a realización dunha serie de actuacións enmarcadas no Plan de Seguridade Viaria de Galicia, co obxectivo de mellorar a seguridade na estrada de titularidade autonómica PO-551 no tramo comprendido polos Concellos de Marín e Bueu. Un proxecto co obxectivo de mellorar a seguridade nun Treito de Concentración de Accidentes.
Esta intervención mellorará unha intersección no tramo de estrada correspondente ao concello marinense. En concreto, a actuación levará a cabo no punto quilométrico 7+320 coa execución dunha cuña de saída que permitirá incrementar a visibilidade e a seguridade nese cruzamento. Unha mellora que se incluíu no proceso de información pública, tras a análise das alegacións presentadas.
No Concello de Bueu, a obra máis relevante será a construción de dúas novas glorietas que se localizarán nas zonas de Lapamán e Agrelo. A esta actuación sumaráselle, ademais, a execución dunha senda peonil, que dará continuidade ata o acceso á praia de Lapamán e a mellora dunha intersección de acceso á praia de Agrelo.
Ademais, pola conflitividade que presentan algúns tramos, está previsto o reforzo da sinalización nos pasos de peóns xa existentes nas parroquias de Cela e Bueu, nas que levará a cabo, en dous deles, a instalación de semáforos con pulsador e sinais luminosos no resto de cruces. Tamén se inclúe no plan de xeito complementario a instalación de captaforos, a mellora dos postes das barreiras substituíndoos por outros menos daniños e a renovación da sinalización horizontal.
Para levar a cabo este proxecto será necesaria a expropiación de 31 leiras, comprendidas no Decreto de Utilidade Pública e conta cun orzamento superior a 1,2 millóns de euros que comezará nas próximas semanas o levantamento de actas previas para dar comezo ás obras en 2020.
Enmarcado dentro do Plan de Seguridade Viaria de Galicia 2016/2020, o proxecto pretende levar a cabo unha serie de actuacións, tanto para a segura circulación de vehículos como para o adecuado tránsito dos peóns, que permita reducir o número de incidentes nos denominados Tramos de Concentración de Accidentes, os TCA.
Ata 2020
Cun orzamento superior aos 15 millóns de euros, a Xunta de Galicia pretende a través deste proxecto mellorar a seguridade nos puntos con máis rexistro de accidentes e nun prazo contemplado ata 2020.