A Xunta de Galicia dará luz verde ás expropiacións para executar unha nova senda na estrada autonómica PO-313, entre Pardavila e Cadro, en Marín. Esta actuación xa foi anunciada o pasado mes de decembro pola conselleira de Infraestruturas, Ethel Vázquez, durante a presentación do itinerario entre Coirados e Pardavila, á que agora se lle dará continuación coa nova senda. En conxunto crearase un itinerario continuo de case tres quilómetros
Para esta actuación, o Goberno galego investirá preto de 650.000 euros, nos que se inclúe o pago dos nove predios necesarios para a súa execución. A Consellería de Infraestruturas e Mobilidade procederá ao levantamento de actas previas e á licitación das obras no segundo semestre do ano. Os traballos contan cun prazo de execución de nove meses.
ACTUACIÓN. O obxecto desta actuación é a construción dunha senda na marxe esquerda da estrada de titularidade da Xunta, no treito comprendido entre os puntos quilométricos 3+330 e 4+130, coa finalidade de seguir mellorando a seguridade viaria na contorna e fomentar a mobilidade sostible.
De modo complementario mellorarase a seguridade viaria dunha intersección e instalarase unha nova marquesiña nunha parada de bus.
CRUCEIRO. Tamén se trasladará lixeiramente un cruceiro que hai na marxe esquerda da estrada, no punto quilométrico 3+350 ata o 3+340, que actualmente provoca que o espazo entre leste e a vía non sexa suficiente para dispor un ancho mínimo de senda.
Os traballos incluirán, ademais, a revalorización do monumento, acondicionándose a contorna da súa nova situación, creando un espazo público para goce dos veciños. Para o pavimento utilizaranse as propias pedras das edificacións situadas agora neste punto. Instalarase tamén iluminación e varios bancos.
Recentemente, a Xunta adxudicou as obras doutra senda en Marín, entre Bagüín e Seixo.
Eliminación TCA
En paralelo, o departamento de Infraestruturas da Xunta está a promover as actuacións necesarias para eliminar os tramos de concentración de accidentes na rede autonómica de estradas no Morrazo. En concreto, está en execución a mellora da seguridade viaria na PO-551 en Bueu e Marín, e están xa licitadas as obras de mellora da mesma estrada en Domaio, no concello de Moaña. Tamén se traballa noutros proxectos, tanto en Cangas como en Moaña.
A Xunta segue dando cumprimento ao seu compromiso de mellorar a rede convencional de estradas autonómicas do Morrazo, tras a finalización da Autovía do Morrazo, na que se investiron 55 millóns.