A noite máis máxica do ano iluminarase este mércores na localidade marinense con máis de cen fogueiras autorizadas. A maioría delas serán privadas, pero haberá cinco comunitarias que deberán seguir un protocolo sanitario, prohibindo a posibilidade de repartir comida e bebida.
Estas fogatas poderanse gozar nas barriadas de Virxe do Carme e de Mogor, así como no Igrexario de San Xulián, en Miñán e en Cantodarea, onde un ano máis se poderá gozar da tradicional gran fogueira da parroquia.
A Asociación de Amijos e Vesiños de Cantodarea, organizadora deste evento, reuniuse este martes coas concelleiras de Festas e Turismo, Marián Sanmartín e Cristina Acuña, para ultimar os detalles da gran fogueira que se poderá gozar alí esta noite. Este ano recrea a tamaño real o faro da Illa
"Todas estas fogueiras comunitarias seguirán unha serie de normas de control de aforamentos, entradas e saídas marcadas e non poderán ter postos de venda de comida ou bebida", explicou este martes Sanmartín, que fixo fincapé en que este foi o protocolo que se aplicou con gran éxito o pasado 2020.
PRAIAS. En canto ás praias, tamén repetindo o ocorrido o ano pasado, pecharanse para evitar as aglomeracións na area que tiñan lugar en anos anteriores á pandemia. A Policía Local procederá ao seu precintado entre as 21.00 e as 21.30 horas desta noite.