O Concello de Marín apostará pola creación dun plan de mobilidade que favoreza a sustentabilidade. En concreto, preténdese levar a cabo unha actuación de mellora nos transportes públicos, as sendas peonís ou os carriis bici para fomentar así un desuso dos vehículos privados e contribuír así contra o cambio climático.
O proxecto Marín 2020 engloba a Estratexia de Desenvolvemento Urbano Sostible Integrado, EDUSI, e terá a súa base nos fondos europeos que xa lle foron concedidos ao Concello de Marín.
A iniciativa, que pretende crear unha rede de mobilidade para a xente da Comarca cómoda, accesible e sostible para o medioambiente, foi aprobada polo Ministerio de Facenda e Administracións Públicas e a xestión estará a cargo do goberno local como Organismo Lixeiro Intermedio.
O proxecto Marín 2020 financiarase cos fondos europeos concedidos ao Concello de Marín
OBXECTIVOS. Entre as diferentes actuacións que se pretenden levar a cabo atopamos a definición dunha rede básica de peóns. Preténdese poder crear sendas seguras e accesibles que favorezan a mobilidade dos veciños sen necesidade de utilizar os vehículos propios. Ademais, dentro do punto específico de mellora do transporte público, preténdese poder instalar unha rede de autobuses limpos, con itinerarios e horarios que se adapten o mellor posible ás necesidades dos marinenses, para así prexudicar o mínimo posible ao medioambiente coa utilización do automóbil particular. O plan inclúe tamén a aposta pola mobilidade eléctrica e o desenvolvemento de sistemas de suministración de enerxías limpas para o municipio. Outro dos puntos que se destaca neste plan, é a mellora das sendas para bicicletas, que faciliten o transporte a través deste medio a todos aqueles que así o desexen e que, actualmente, aínda se atopa en puntos escasos.
Marín 2020 non só pretende mellorar a accesibilidade e mobilidade dentro do centro urbano, senón tamén o desenvolvemento de mellores conexións cos demais núcleos de poboación próximos, como Pontevedra ou Bueu.
Tras o primeiro documento elaborado pola Universidade de Vigo para solicitar os fondos, nas próximas semanas preténdese poder comezar a licitar a contratación para poder levar a cabo a redacción dun plan acorde con todos os obxectivos.
