A Deputación de Pontevedra dá luz verde á suma total que recibirán os Concellos de Marín e Bueu para axudar aos sectores afectados pola pandemia. En total repartiranse 223.300 euros entre ambos os municipios do Morrazo, que se enmarcan na liña dúas do Plan Concellos 2021.
Desta cantidade, Marín recibirá 70.900 euros e Bueu, 152.400 e, tal e como len as bases aprobadas por ambos os Concellos, estarán destinadas a persoas autónomas ou empresas con menos de dez empregados de sectores como a hostalería, as axencias de viaxes ou os ximnasios e poderán alcanzar como máximo os 1.000 euros por solicitante.
No caso específico de Bueu, que presentou as súas axudas a pasada semana, especifícase a maiores que tamén poderán optar ás axudas os establecementos que tiveron que pechar polas medidas restritivas derivadas da pandemia ou aqueles que, sen pechar, sufriron unha baixada do 40% na súa facturación. solicitantes.
O Concello de Marín, pola súa banda, pechou hai unha semana o seu período de solicitude cun total de 70 persoas interesadas en obter as axudas. Os servizos municipais encargaranse estas semanas de comprobar que os solicitantes cumpren con todos os requisitos establecidos nas bases, antes de comunicar oficialmente quen serán os beneficiarios das axudas da Deputación.
