Marín vístese de gala este sábado para celebrar unha das probas máis especiais do curso atlético: a Milla Urbana San Miguel de Marín. A cita contará con proba elite e circuítos adaptados aos máis pequenos, ademais dunha proba de cinco quilómetros homologados destinada a deportistas de sub-18 en diante.
Os primeiros en saír a correr serán os sub-10 feminino ás 17.00 horas. Así, sucederanse as saídas cada dez minutos ata as 18.30, momento en que será o momento da proba máis longa, a de 5.000 metros. Tras iso, será a quenda da Milla Popular (feminino ás 19.10 e masculino ás 19.20 horas).
Para rematar, celebrarase a Milla Élite. As mozas sairán ás 19.30 horas, mentres que os mozos farano 15 minutos despois. Destacan na lista de inscritos os nomes de Alice Finor (Celta), Leticia Fernández Barbosa (ADAS), Raquel Meaños (Valencia Esports) ou Paula de La Torre (Sociedade Ximnástica de Pontevedra), mentres que en mozos o gran favorito é Víctor Riobó (Miler Running Club), aínda que terá a rivais moi fortes como Jorge Puig (CAS) ou Carlos Porto (Sociedade Ximnástica). De feito, ambos quedaron por diante do pontevedrés na Milla Urbana de Sanxenxo.
TROFEOS. Logo destas carreiras, ao redor das 20.00 horas, realizarase a entrega de trofeos. Cabe destacar que haberá premios económicos para os cinco primeiros clasificados elite masculino e feminino. Ademais, entregarase medalla aos tres primeiros clasificados desde a categoría sub-18 ata veteranos C (maiores de 55 anos).
Desta forma, Marín xa ten todo listo para unha das citas máis esperadas, que inician o curso para moitos atletas novos.
