A vila marinense non quixo deixar escapar este ano tan atípico sen celebrar na medida do posible o seu San Miguel, unha das festividades máis esperadas do calendario do municipio. Nesta ocasión, e por primeira vez no medio século, a pandemia impediu que os veciños da localidade gozasen da súa tradicional Danza de Espadas.
Considerada como Festa de Interese Turístico de Galicia desde o ano 2002, esta danza reúne cada ano máis dunha trintena de adultos e nenos para bailar ao son da música tradicional en honra a San Miguel.
A súa esencia mantívose con todo intacta a través dos devotos que acudiron vestidos co traxe branco tradicional para facer deste evento unha data memorable a pesar das extraordinarias circunstancias.
Como cada ano, a estatua en honra aos danzantes recibiu a súa ofrenda floral en presenza de veciños e autoridades que gozaron do momento acompañados pola música tradicional na Praza do Reloxo. Ao berro de "¡Que viva San Miguel!", as flores brancas e azuis depositáronse xunto á escultura dos nenos danzantes que este ano presenciaron o momento con menos da metade dos espectadores habituais.
Cumprindo as estritas medidas e distancia de seguridade, os asistentes percorreron o camiño cara ao Templo Novo para asistir á habitual misa de cada 29 de setembro. A igrexa, que se mantivo pechada unha vez completou o aforamento, dispuxo de todas as medidas de hixiene e prevención obrigatorias para celebrar o servizo relixioso en presenza de autoridades e veciños.
O evento finalizou coa actuación do artista José Gil, do grupo Picuiña, que conmemorou a Danza de Espadas marinense interpretando a súa melodía cunha gaita restaurada de máis de 200 anos de antigüidade e orixinalmente empregada para ese fin no século XIX.
O Ateneo Santa Cecilia, que se encarga da organización dos festexos deste día xunto ao Padroado de Mareantes de San Miguel
Este mércores será o último día no que se poderá gozar deste conxunto de instantáneas que percorren algúns dos momentos das pasadas edicións deste evento e que desde a organización esperan poida ser diferente no 2021.
