Como cada 4 de abril desde 1976, Marín honrou este martes o Día da Liberación, que este ano celebra o seu 214 aniversario. Un acto simbólico e unha ofrenda floral fronte ao monólito de Juan Gago de Mendoza, situado na rúa Augusto Miranda, recordou a gloriosa xesta das Alarmas do Morrazo que, capitaneadas polo corsario natural de Aguete, conseguiron liberar Marín das tropas francesas de Napoleón.
A solemne homenaxe deu comezo cunha actuación musical do grupo de gaitas Os Chaneiros. A alcaldesa de Marín, María Ramallo, e o presidente da Asociación Ademar, Manuel Torres, foron os encargados de depositar fronte ao monólito a tradicional coroa de loureiro, homenaxe á que lle seguiu a interpretación do himno galego por parte da agrupación.
Na cita, ademais da rexedora e Torres, tamén estiveron presentes outros membros do Goberno local, así como unha representación da Policía Local e Nacional.
Este foi o único acto celebrado este martes, xa que, con motivo das datas de Semana Santa, o Concello decidiu aprazar os eventos institucionais á semana que vén. Así, o martes 11 de abril, a partir das 19.30 horas, o Museo Manuel Torres acollerá a tradicional homenaxe a este suceso, incluíndo a entrega do Premio Liberación 2023.
Dito recoñecemento dedicarase este ano a dona Julia García Domínguez, viúva de don Ceferino Iglesias, a título póstumo. O acto, así mesmo, tamén contará coa lectura dunha descrición histórica sobre a xesta por parte de Julio Santos Pena.
Este trátase do primeiro ano que o Concello de Marín asume por completo a organización dos actos do Día da Liberación, despois de que en 2022 Torres, tras 46 anos ao cargo da cita, decidise ceder a batuta da homenaxe á administración municipal co fin de manter a súa celebración anual.