Marín poderá gozar das festividades de San Xoán e San Pedro coa realización de fogueiras con previa autorización. Iso si, lonxe das praias. Ademais, tampouco haberá os tradicionais postos de repartición de comida. Esta tradición terá que celebrarse seguindo coas obrigatorias e necesarias medidas derivadas da situación sanitaria da Covid-19.
O prazo para presentar as solicitudes de fogueiras ábrese este xoves e terminará o vindeiro venres día 19 de xuño. A partir dese momento, o Concello avaliará cada petición para confirmar a súa viabilidade. Aqueles que desexen realizar unha solicitude deberán facelo no prazo indicado presentando –a través da sede electrónica ou no Rexistro municipal con cita previa– o documento correspondente no que deberán indicar nome e apelidos, DNI, tipo de fogueira (pública ou privada) e data do seu aceso, entre outros datos.
Para poder festexar esta arraigada tradición deberanse seguir unha serie de normas. Entre outras cousas está prohibido realizar fogueiras na vía pública pavimentada, zonas axardinadas ou espazos verdes, así como baixo tendidos eléctricos. Ademais, as fogueiras terán que gardar unha separación mínima de 12 metros lineais coa vexetación, casas e edificios máis próximos.
A altura máxima de cada fogueira será de 14 metros e o diámetro da zona de combustión non superará os seis metros de ancho. Para iso só poderase utilizar leña, ramas, tronco de árbores ou calquera material de madeira.
Co cumprimento das normas, o Concello pretende garantir a protección e a seguridade das persoas que participen nestas festas tan tradicionais.
