A Escola Naval Militar de Marín recibiu este venres o recentemente nomeado almirante director de Ensino Naval (Adiena), o contraalmirante Victoriano Gilabert Agote, que realizou a súa primeira visita ao centro castrense para inaugurar o curso 2018-2019.
Gilabert recibiu as Honras de Ordenanza polo Batallón de Alumnos, pasou revista ás tropas e gozou do desfile dos estudantes, posterior á salva de canonazos. A continuación, trasladáronse ao salón de actos para proceder á inauguración do ano académico. O comandante director da Escola Naval de Marín, Ignacio Cuartero, destacou que os actuais alumnos serán os oficiais do futuro e os motores da transformación da Armada, polo que lles pediu que leven sempre por diante os valores que se lles inculcan nesta Escola.
"Máis que unha profesión, esta é unha forma de vida de homes honrados que cumpren cos valores da Armada", dixo, e destacou a honra, o valor, a disciplina e a lealdade como os alicerces fundamentais para o desenvolvemento persoal e profesional dos alumnos do centro mariñense.
Pola súa banda, o almirante director de Ensino Naval mostrouse orgulloso de inaugurar o curso en Marín desde o novo cargo que ocupa e de facelo "regresando á Casa Nai, que é herdeira dunha gran tradición", dixo referíndose á Escola Naval de Marín.
MODERNA E DE CALIDADE. Falou o contraalmirante da formación que se imparte no centro castrense como "moderna e de calidade, acorde aos tempos actuais pero sen esquecer a tradición", e pediu aos alumnos que se sintan "orgullosos e privilexiados de ser desta escola", un centro, dixo, "adaptado aos novos tempos que corren".
Gilabert recordou que el tamén estivo sentado nas mesmas butacas que este venres ocupaban os alumnos e animoulles a manter a "ilusión. Tedes mocidade e en 30 anos algúns estaredes nesta mesa porque seredes os líderes da Armada en 2050".
O mantemento dos valores e que estes sexan unha referencia constante, o empeño, a ilusión e o afán de superación persoal foron outros dos consellos que o almirante director encomendoulles para os seus anos de estudo, para rematar desexándolles "sorte e éxito neste novo curso que comeza".
Gilabert Agote asinou no libro de honra da Escola Naval Militar unha vez finalizados todas as honras de ordenanza da xornada.
