A empresa Recolte, adxudicataria na actualidade do servizo público de recollida, transporte e tratamento de residuos domésticos e asimilables no Concello de Marín, presentou ao Goberno municipal un requirimento para cederlle o seu contrato á empresa Urbaser, que foi a responsable da xestión do lixo en Marín durante 16 anos.
O Concello recibiu esta noticia con receo. Así, a concelleira de Medio Ambiente, Marián Sanmartín, recorda que a experiencia do municipio coa empresa Urbaser foi "regular". Segundo explica a edil, os colectores e a maquinaria eran moi vellos na última etapa da concesión da entidade, que finalizou o seu contrato en xullo de 2017, e que incluso o Concello recibía queixas dos veciños e veciñas por un deficiente tratamento dos residuos na vila.
De feito, cando Recolte fíxose cargo da xestión o Concello quedou satisfeito. Cambiáronse todos os colectores e o servizo mellorou, asegura.
Marián Sanmartín recorda que a experiencia con esta empresa foi "regular"
Con todo, Sanmartín insiste en que "non podemos negarnos" a esta cesión, polo que Urbaser sería a concesionaria do contrato, que finaliza dentro de seis anos.
Esta situación é consecuencia da compra, por parte de Urbaser, dos dereitos de contrato de Recolte a nivel xeral, afectando a todos aqueles concellos nos que a empresa ten adxudicado este servizo. Ademais, esta cesión contractual está amparada pola Lei de Contratos do Sector Público.
Os departamentos técnicos e xurídicos do Concello están a avaliar a proposta da cesión contractual exposta por Recolte para emitir un informe no que se confirmará a validez da mesma. Con todo, quen tramitará a cesión do contrato de Recolte a Urbaser será o Pleno da Corporación.
Sanmartín explicou, con todo, que o Goberno municipal estará vixiante do servizo e recordou que Urbaser terá que cumprir as mesmas condicións e o mesmo contrato que ata agora estaba en mans de Recolte.
O presidente da Mancomunidade e alcalde de Cangas, Xosé Manuel Pazos, a alcaldesa de Moaña, Leticia Santos, e o alcalde de Bueu, Félix Juncal recibiron tamén con receo esta noticia e puxeron de relevo a mala experiencia de todos estes concellos coa empresa Urbaser.
A diferenza do caso marinense, na Mancomunidade Recolte ten un contrato en situación de prórroga.