A Biblioteca Municipal de Marín foi este domingo escenario dun acto que, un ano máis, serve para render homenaxe a aquelas entidades, colectivos e particulares que, a través das súas actuacións culturais, profesionais, empresariais ou políticas axudan a que o municipio da península do Morrazo continúe ampliando o seu legado histórico. Por sétimo ano consecutivo, o grupo de acción cultural Xornadas-Reencontro coa Historia de Marín fixo entrega dos premios Facendo Historia.
Nesta ocasión, tal e como se anunciou o pasado de outubro, os galardoados foron o Taller Xoiería Ángel Fariña Rosant, no apartado de Industria e Comercio Xeracional; o Marín Club de Fútbol na categoría de Entidades Deportivas Históricas; o doutor J. Alberto Fernández Villar, que destacou en Eminentes Profesionais Marinenes e a Escola Naval Militar en Institucións Locais Relevantes. Por parte da ENM, recolleu o premio o comandante-director Ignacion Cuartero Lorenzo, mentres, que, no caso do Marín CF, foi a súa presidenta, Rosalía González Cidrás, quen acudiu á cita. Dáse a circunstancia que esta última tamén foi recoñecida por haberse convertido na primeira muller que asume o cargo na emblemática entidade deportiva. Por parte da Xoiería Rosant, acudiu a súa fundadora, Mara Fariña.
Auténticas referencias
O presidente do colectivo organizador deste evento, Ángel Carragal, foi o encargado de presentar a cada un dos homenaxeados. O máximo responsable da comisión recordou, por exemplo, os 70 anos de vida do club marinense, ou os tres cuartos de século que a Escola Naval Militar leva asentada en Marín, converténdose nunha das súas institucións máis coñecidas. O xornalista local Julio Santos Pena encargouse de ler as descricións de todos os premiados e destacou os méritos realizados por cada un deles para recibir este recoñecemento.
Consolidación
Á cita non faltou a alcaldesa, María Ramallo, que felicitou aos gañadores e animou á organización a continuar consolidando esta cita.
Os premios están patrocinados polo Concello, o Colexio Oficial de Avogados de Pontevedra e a Asociación de Comerciantes Estrela de Marín.
