A preocupación pola seguridade viaria na vila marinense está na axenda política desde que o Goberno local mostrou, a pasada semana, a súa intención de aplicar os 30 km/h como velocidade máxima en todo o centro urbano, unha medida solicitada pola oposición tras o tráxico accidente mortal que se produciu en Jaime Janer este verán.
As distintas forzas políticas do Consistorio debateron as propostas achegadas pola concelleira non adscrita, Pilar Blanco, e a portavoz do BNG, Lucía Santos, en sendas mocións, que levarán ao Pleno da próxima semana. A non ser que se produzan cambios de última hora, ambos os documentos sairán adiante co voto unánime dos membros da Corporación, a pesar de que os populares non tiñan clara a súa posición con respecto aos outros puntos que recollen as mocións, máis aló da aplicación da zona 30.
"O BNG pídenos que tomemos máis medidas para reducir a sinistralidade, pero xa puxemos lombos en diversos puntos, como en Jaime Janer e en Concepción Areal", asegura o concelleiro de Tráfico, Francisco Estévez, que con todo informou que o seu partido está a favor da proposta de Pilar Blanco de que se realice un novo estudo pormenorizado da seguridade viaria nas rúas e estradas do municipio. "No seu día xa se fixo un, pero encargaremos outro máis completo, no que utilizaremos unha orde de prioridade claro: os peóns, as bicicletas e, para rematar, os coches".
Aínda que a peonalización do centro urbano de Marín dista moito de converterse nunha realidade próxima, as cifras de accidentes de tráfico apuntan a unha mellora indubidable da sinistralidade do municipio. Segundo recolle a Policía Local, os accidentes rexistrados pasaron de ser 119 en 2013, a 138 en 2014 e 60 en 2017. é dicir, que en cinco anos reducíronse á metade os sinistros na estrada. A pesar de todo, Estévez indica que nos balances de 2013 e 2014 tamén se incluían "os partes amigables, ou sexa, que os sucesos de gravidade non eran tantos".
EN SEGUNDO PLANO. Aínda que a concelleira non adscrita mostrouse onte satisfeita polo apoio que o Goberno local deulle á moción durante a comisión, asegura que "non as temos todas connosco", xa que considera que as medidas que se piden son "de carácter urxente" e, aínda que é necesario tomalas, deberíase elaborar un Plan de Tráfico "para ter unha base sobre a que seguir mellorando". "Solicitamos celeridade", declarou Blanco, e compromiso por parte dos populares de que algunhas das restricións que xa existen, como a que prohibe ao tráfico pesado circular polo centro urbano, "de verdade se cumpran, porque iso segue a acontecer todos os días".
"Non valen desculpas, a seguridade viaria non é unha prioridade para este Concello e debe selo", sentenciou.
Pola súa banda, a portavoz do BNG, Lucía Santos, pediu ao concelleiro que este asunto "se leve adiante e non quede nun caixón, como tantas outras veces pasou con mocións e acordos".
