A alcaldesa de Marín, María Ramallo, asinou este martes xunto á comisaria provincial do Corpo Nacional de Policía en Pontevedra, Estíbaliz Palma, a renovación do convenio do protocolo de colaboración do programa de seguimento integral de vítimas de violencia de xénero, VioXén. A subdelegada do Goberno, Maica Larriba, presidiu a Xunta Local de Seguridade extraordinaria na que se subscribiu este novo protocolo, que recolle a repartición de funcións e asignación de vítimas adecuándose ás referencias normativas actuais.
O municipio marinense conta na actualidade cun total de 33 casos activos de violencia machista, con dúas en risco alto e cinco en risco medio. Todos eles reciben seguimento a través deste sistema posto en marcha no 2007 pola Secretaría de Estado de Seguridade do Ministerio de Interior co obxectivo de establecer unha rede nacional que permita o seguimento e protección de forma rápida, integral e efectiva das mulleres vítimas de malos tratos e dos seus fillos en calquera parte do país.
O documento subscrito este martes serve de acordo para establecer as diferentes competencias da Policía Local e a Policía Nacional na protección das vítimas de violencia machista, explicou a xefa da unidade de Violencia de Xénero da Subdelegación do Goberno, Manuela Vilaboi. Deste xeito, o protocolo define o seguimento e a repartición de casos de cada comisaría, o que "permite sumar máis efectivos á protección daquelas mulleres que máis nos precísan, as vítimas", sinalou Larriba.
Este acordo é "imprescindible para que as forzas e corpos de seguridade local e estatal poidan colaborar, compartir información e traballar coordinadamente, optimizando os seus recursos".
