Marín Vivo volverá abarrotar a vila de centos de amantes da música en directo. Este certame, que chega á súa cuarta edición e que xa se converteu unha cita de referencia para os festivaleros de toda a provincia, celebrarase o sábado 20 de xullo no parque Eguren.
Así, tras abarcar nas anteriores edicións diferentes estilos musicais como o rock&roll, rythm&blues, punk pop ou o surf, esta vez a vila marinense vibrará a ritmo de power pop e indie. E as bandas elixidas non deixarán indiferente a ninguén: Cooper e Anni B Sweet darán o mellor de si a partir das 23.00 horas e ante a mirada de centos de persoas, que poderán gozar gratis destes concertos.
A actuación de Cooper (León) será a última oportunidade de velo en directo en Galicia este verán, xa que, logo de 35 anos de carreira, anunciou hai escasos días a súa retirada definitiva. "A música de Cooper é pop rock e power pop, con riffs de guitarras, melodías coidadas e sección de ventos, pura enerxía e intensas letras, executadas por sete músicos sobre o escenario", destaca a organización do festival.
Pola súa banda, a moza andaluza, chegará ao Marín Vivo para presentar en primicia para Galicia o seu recentemente editado álbum Universo por estrenar. "Un cambio total respecto dos seus tres álbums anteriores, pois está composto integramente en castelán e lánzase ao pop perfecto de retrousos infecciosos, con arranxos de electrónica retrofuturista e neopsicodelia. Unha marabilla dunha das nosas artistas máis internacionais", sinala.
Polo escenario do Marín Vivo pasaron algunhas das bandas que actualmente están no máis alto do panorama musical nacional, como Carolina Durante, Novidades Carmiña ou The Limboos.
