O mariñeiro Agustín Villaverde Sanjorge, natural de Marín, faleceu mentres faenaba nas Malvinas a bordo do buque Praia de Galicia, da empresa Pesmar. Un accidente cunha das pastecas do arrastreiro provocou o fatal desenlace, segundo informaron fontes do sector. Villaverde Sanjorge, que cumpriría 56 anos en outubro, perdeu a vida tras golpearse con esta ferramenta usada para o izado de redes.
A vítima, moi coñecida na vila, embarcou o pasado mes de agosto e dáse a circunstancia de que esta sería a súa última campaña tras unha vida dedicada ao mar. A noticia do seu falecemento foi recibida con consternación en Marín, xa que non é o primeiro revés que sofre a familia.
'PRAIA DE GALICIA'. A Praia de Galicia, con amarre na vila, atopábase faenando na zona de augas internacionais próxima ás illas Malvinas. Trátase dun buque de 54 metros de eslora e 10 de manga construído no ano 1981.
