As Festas do Carme máis atípicas celebrarán este mércores a véspera do seu día grande con actuacións por todos os recunchos do municipio. A maxia foi a protagonista o martes, na quinta xornada das celebracións coa actuación infantil do Mago Noel, que reuniu a decenas de nenas e nenos na Alameda de Marín para gozar dunha noite de verán.
A música é a gran protagonista das festas deste ano, pensadas por e para os marinenses, con pasacalles e charangas diarios. Así o explica a concelleira de Festas, Marián Sanmartín, que destaca que o programa deste ano non está especialmente pensado para atraer turismo, senón para o goce dos veciños da vila con grupos locais que durante meses tiveron que sufrir o confinamento.
Tamén co obxectivo de favorecer a reactivación económica local. "Nótase máis afluencia nos últimos días", sinala Lupe Pérez do céntrico bar marinense Carballinés, aínda que non só o achaca aos festexos, "hai máis xente de fóra", engade.
Os de Marín foron os encargados de amenizar a noite do martes cun percorrido polas rúas do centro urbano no que non faltou a expectación de todos os veciños, mentres que a charanga Jalácticos puxo o peche á xornada.
MÁIS MÚSICA. A noite do mércores collerán a testemuña o grupo Mais Cantos, cunha experiencia musical polo centro urbano ás 20.30 horas e os da charanga Noroeste, cun percorrido polas rúas de Marín, que terá lugar a partir das 21.30 horas. Tampouco faltarán as actividades para os máis pequenos, que poderán gozar dunha actuación infantil do grupo de teatro Tarabelos ás 21.00 horas na Alameda.
Pola noite, a partir das 23.00 horas terá lugar un dos pratos fortes desta edición con cinco concertos repartidos polas rúas do municipio.
Na Alameda actuará o grupo Demasiadas Sombras y Pocas Luces e na Rúa Méndez Núñez atoparase The Legend. Sara e Sofía actuarán na Praza 8 de Marzo, Terapia de Grupo na Rúa Augusto Miranda e Edgar Vero e Mery Aguete farano na Rúa Ezequiel Massoni.
Os pasacalles animarán a xornada, que contará ademais co concerto da banda de música Musimarín ás 13.00 horas na Alameda e unha batucada de Os da Caña ás 21.30 horas. Os máis pequenos poderán gozar tamén dunha actuación da man de Truque Matruqe ás 21.00 horas na Alameda.
Bueu
A vila budetense celebra a súa Semana Mariñeira hoxe con diversas rutas marítimas a bordo do Chasula, un taller infantil da man do colectivo Os Galos ás 11.00 horas e unha xornada de portas abertas de 19.00 a 21.00 horas, ambos no estaleiro de Banda do Río. O peche levarao a cabo Sés cun concerto ás 22.30 horas no Centro Social do Mar.
