O Porto de Marín viviu este martes unha intensa xornada nos peiraos cun total de sete mercantes traballando de forma simultánea en operacións de carga e descarga, coincidindo co inicio da tempada de descargas de peixe conxelado.
O granelero CIC Epos, procedente do porto de Itaqui (Brasil), depositou o maior volume de mercancía, deixando nos almacéns do Porto preto de 70.000 toneladas de millo. Atópase operando no Peirao Oeste e está consignado polo Grupo Nogar.
Ademais deste, os barcos Lausanne e Louis traballaron este martes nos peiraos Adolfo Reboredo. Ambos están consignados por Pérez Torres Marítima e están a levar a cabo operacións de carga de produtos metalúrxicos e descarga de siderúrxicos, respectivamente.
PESCA CONXELADA. Doutra banda, catro dos buques que onte operaron á vez no Porto encargáronse da descarga de peixe conxelado, que acaba de iniciar a tempada. Os conxeladores Igueldo, Praia de Galicia, Monteferro e Montelourido están a realizar operacións para as diferentes plantas frigoríficas da localidade. Ademais, está anunciada para os próximos días a chegada doutros pesqueiros como o Capricorn, Arousa Nove, Vila de Marín ou Paradanta Primeiro.
A pesca conxelada é unha mercancía en continua evolución desde hai uns anos no Porto de Marín, que conta coa certificación europea de calidade para este sector, un dos que máis empregos xera na contorna. A rada conta cunha capacidade de almacenamento duns 262.000 metros cúbicos e, desde as súas plantas de frío, exporta aos principais mercados de Europa.
