O Ministerio de Pesca prohibiu ao Porto de Vigo que, a partir do próximo sábado, día 1, descargue colectores que conteñan fariña de peixe e recomendou que estes movementos os acolla a rada marinense.
Unha inspección nas instalacións portuarias viguesas detectaron en setembro "deficiencias para garantir a salubridade deste tipo de produtos" no Punto de Inspección Fronteirizo (PIF), da citada Autoridade Portuaria. Posteriormente, en marzo, a secretaría xeral de Acordos Sanitarios e Control de Fronteiras do Ministerio Pesca realizou unha nova inspección e informou as autoridades de que non se podían seguir controlando as fariñas de peixe nas instalacións actuais do porto.
Isto débese a raíz do incremento de partidas deste tipo de produtos, que pasaron en 2017 de ser un 2 ou 3% do total a converterse nun 15% o pasado exercicio, polo que as dependencias non garanten que se poida facer un control "aceptable" da materia.
"Ademais, en 2019 existe unha alerta sanitaria sobre este produto polo que é necesario a inspección completa e a toma de mostras de todo ou envío antes de autorizar a súa venda na Unión Europea", explicou a subdelegación do Goberno en Pontevedra.
Por isto, tanto a entidade como os servizos de inspección de Sanidade Vexetal, Sanidade Animal e Sanidade Exterior reuníronse este venres para buscar unha alternativa ao control das fariñas de peixe mentres as dependencias atópanse en obras para volver realizar este labor.
OPORTUNIDADE. Hai algunhas semanas, o Ministerio de Pesca remitiu unha carta á Autoridade Portuaria de Vigo na que lle recomendou que os colectores que conteñan fariña de peixe sexan trasladados ao Porto de Marín a partir do 1 de xuño.
De facerse real este transvasamento de actividade favorecerá o tráfico na rada marinense que no primeiro trimestre deste ano tivo resultados negativos. En concreto, rexistrou un 7,86% menos que no mesmo período do exercicio anterior. A dársena moveu 584.579 toneladas en 2019, mentres que en 2018 foron 634.476. O descenso foi máis acusado en canto a colectores, un 10,32% menos.
