A maxia do Nadal regresará este ano á vila marinense cunha programación lúdica e cultural que se asemella xa á da prepandemia. O Goberno local prepara estas semanas a organización da época festiva, que traerá de volta a feira de artesanía na Alameda, o tradicional tren do Nadal e as carpas de entretemento para nenos e novos.
Estes dous espazos situaranse novamente na Alameda e no Parque Eguren e estarán destinadas a dous grupos diferentes de idade. A primeira destas dúas dedicarase aos máis pequenos, ata aproximadamente os 12 anos, mentres que na segunda buscarase ofrecer un conxunto de actividades especialmente pensadas para os novos desa idade en diante.
Regresará tamén o tren do Nadal, un dos elementos indicadores do comezo das festas na localidade e un clásico moi utilizado por toda os veciños, especialmente polos máis pequenos e os centros educativos, que poderán empregalo antes do final das clases.
Aínda que a nova normalidade parece chegar para quedar, a edil de Festas, Marián Sanmartín, quixo recalcar que "en todo momento manteremos as medidas sanitarias que estean vixentes" co obxectivo de continuar mantendo unha boa situación sanitaria no municipio.
No que respecta á decoración, volverá novamente a apostarse por un formato que combine a iluminación coas estacións decorativas, que achegarán estampas tradicionais destas festas a diferentes puntos da vila.
ALUMADO. A iluminación deste ano contará cun orzamento de licitación de 72.600 euros e atópase nestes momentos en pleno proceso de presentación de ofertas. Este finalizará a próxima semana, para poder comezar así a adxudicación do servizo.
Estas luces combinaranse coas estacións, nas que se poderá gozar dunha vila do Nadal, os camelos reais ou o Portal de Belén, entre outros.
