Marín vestiuse de loito este xoves para despedir ao que foi o seu alcalde durante catro anos, Augusto Casal Sánchez. O que foi rexedor entre 1995 e 1999 faleceu o pasado mércores, aos 71 anos, no Hospital de Montecelo, tras unha dura loita contra a enfermidade que padecía.
Unha noticia que recibiron apesados os cidadáns, que este xoves congregáronse no Templo Novo para darlle o último adeus ao alcalde que, entre outras accións, conseguiu a Leira de Briz aos marinenses.
A pesar do mal tempo, os seus achegados e veciños acompañaron á familia de Casal.
Unha familia que a alcaldesa de Marín describiu na súa carta de despedida como o "gran tesouro" do exalcalde. Un home querido por moitos que estaba altamente implicado nas diversas actividades da vila. Un "activista cultural e social desde que naceu", comunicou Ramallo na súa carta dirixida ao home en cuxo mandato deu comezo a súa traxectoria política.
