Sen oco para visitar as Cíes

Ao atractivo do Parque Nacional Marítimo-Terrestre Illas Atlánticas non o están conseguindo eclipsar nin as restricións nin a situación sanitaria. Este espazo natural protexido comprende as illas de Ons, Cíes, Sálvora e Cortegada, sendo as dúas primeiras as máis coñecidas e visitadas. Con todo, neste ano marcado polas medidas de seguridade destaca a gran demanda existente cara ao arquipélago das Cíes.

O sevillano Álvaro Pineda e a súa parella trasladáronse ata Pontevedra desde Cudillero para gozar dunhas tranquilas vacacións. á súa chegada á capital das Rías Baixas decidiron planear unha escapada ás Illas Cíes. Querían volver gozar da illa que os cativou hai anos. Ademais recibiran múltiples reseñas positivas do lugar por parte de familiares e amigos. Por iso, decidiron levar a cabo o procedemento para poder acceder ao paraíso natural.

Para navegar ata as Illas Atlánticas é preciso obter a autorización administrativa gratuíta, dispoñible na páxina web da Xunta de Galicia, e adquirir un billete de transporte nunha navieira autorizada. Ademais, se se desexa empregar o servizo de cámping tamén é necesaria unha autorización para pasar a noite no arquipélago, a cal será tramitada por propio cámping ao reservar este servizo.

Poder aproveitar para facer sendeirismo e acampar en plena natureza era o plan perfecto para a parella. Pero, para o seu desgusto, ao intentar obter o billete e a autorización necesaria para poder acceder ao espazo protexido, a súa idea viuse truncada: "Tiña a espiña de volver visitar a illa, pero cando contactamos informáronnos de que non existía a posibilidade de acudir ata o 1 de agosto", afirma Álvaro Pineda.

Actualmente a espera para poder acudir ás Illas Cíes aínda se alargou máis. O aforamento diario de 1.800 persoas está completo ata o 15 de agosto, onde tan só hai 8 prazas. Ademais desde o 16 ao 19 do mesmo mes os billetes volven estar esgotados. Polo que de desexar facer unha escapada a este arquipélago da Ría de Vigo a mellor opción é realizar a reserva canto antes.

Tras a noticia, a parella sevillana tamén valorou a posibilidade de acudir á Illa de Ons, xa que a visita a este espazo protexido é moito máis accesible en canto á dispoñibilidade de prazas. Polo momento aínda hai autorizacións dispoñibles durante todo o verán. Pero, a pesar de haber billetes, non tiveron a oportunidade de ir debido aos cambios de plans.

Ante todo, para poder visitar calquera dos arquipélagos o cumprimento das medidas de seguridade é esencial