O colectivo de pacientes A Voz da Sanidade de Cangas do Morrazo manterá este luns, ás 11.00 horas no salón de actos do centro de saúde do municipio, unha reunión con pais e nais das parroquias do Hío e Aldán para analizar "o déficit de atención pediátrica" que, segundo denuncian, padecen os nenos.
Tal e como explica a asociación nun comunicado, Cangas conta con 3.570 menores de 15 anos que "ata hai poucos meses estaban atendidos por catro pediatras": unha consulta de mañá no centro de saúde de Aldán e outras tres no de Cangas -dúas de mañá e unha de tarde-.
Con estas cifras, o número de pacientes por cada profesional quedaba por baixo dos mil, segundo calcula A Voz da Sanidade, seguindo o acordo do Plan de Mellora de Atención Primaria 2007-2011, que recomendaba que cada pediatra se ocupase dunhas 800 cartillas.
"A día de hoxe, a poboación infantil de Cangas conta soamente con dúas consultas pola mañá, orixinando que estes profesionais soporten unha cifra que ascende a máis de 1.700 pacientes", lamenta o colectivo de pacientes, que, á súa vez, tacha estes feitos como "un menoscabo" na calidade sanitaria da poboación infantil do municipio.
Así mesmo, A Voz da Sanidade fai un chamamento aos pais das parroquias de Cangas, Darbo e Coiro "para defender xuntos a calidade sanitaria" dos nenos na reunión deste luns.