Reivindicar e recordar a necesidade de paz no mundo son os principais obxectivos da iniciativa Flowers of Peace, á que o Colectivo Independente de Alfombristas da Bueu&por segundo ano consecutivo. A igrexa parroquial de San Martiño volveu ser o espazo escollido para expor a alfombra floral bueuesa, que este domingo foi visitada por decenas de veciños e veciñas, sumándose así aos máis de 70 lugares do mundo que na xornada do Domingo de Ramos quixeron pór o seu granito de area en contra das guerras.
A acción, impulsada pola asociación Infioritalia, consiste na elaboración de alfombras florais simultáneas por todo o planeta, pero co mesmo deseño, para mandar unha mensaxe de unidade. O proxecto naceu o ano pasado para mostrar rexeitamento á guerra de Rusia contra Ucraína. Nesta segunda edición, ademais de España, tamén Polonia, Hungría, Portugal, México, Costa Rica ou India foron algúns dos países que se uniron á iniciativa.
A de Bueu, segundo contou a presidenta do colectivo que a realizou, Carmen Farto, foi elaborada con materiais "de tempada obtidos da propia natureza, como todos os nosos proxectos, non compramos nada". Así, colocáronse follas e flores secas –maiormente siemprevivas– ademais de area, serrín e cocos de eucalipto. A alfombra, dun tamaño de 1,60 metros de longo e 1,20 de ancho debido ao tamaño do altar do templo, presentouse inclinada, polo que foi necesario aplicar cola para asegurar os materiais.
Á elaboración da mesma, na que participaron catro persoas da asociación, dedicáronlle "dúas horas diarias durante unha semana", asegura Carmen. Para elas, este labor é "a nosa paixón, somos un equipo pequeno, pero nos gusta traballar e levar a cabo proxectos polo ben de todos", conta.
Tras a súa exposición na igrexa de San Martiño, a alfombra dará a volta ao mundo coa difusión dun vídeo en redes sociais que reúne todas as creacións florais. Para as de Bueu dar a coñecer o seu traballo é "un verdadeiro orgullo, pero o que máis nos importa é que cale a mensaxe de paz".
