A reputada guía de viaxes Le Petit Futé volveu destacar na súa edición de 2019 o Centro de Interpretación de Petróglifos de Mogor, tal e como fixo o pasado ano. A publicación fixo unha pequena reseña sobre o espazo marinense "ao aire libre no que tres rocas están decoradas con gravados, entre os que destacan en particular dous labirintos", explica.
O público francés é o máis habitual entre os visitantes estranxeiros que se achegan a Mogor para coñecer os seus petróglifos. "Veñen moito ao nordeste de España e por iso o lugar aparece na edición da Petit Futé que afonda nas comunidades de Asturias, Cantabria, Castela e León e Galicia", explicou o arqueólogo que se atopa á fronte do CIP, Juan Castro.
A guía recolle, ademais de que existe unha ruta para coñecer o lugar, que "o centro de interpretación organiza visitas guiadas, algunhas nocturnas, para explicar os tesouros do sitio aos visitantes".
"Cando cheguen persoas francesas preguntarémoslle como coñeceron este lugar porque malia que a información xeral está en todos lados a través da rede, hai moita xente que prefire viaxar confiando nunha guía", apuntou Castro sobre o impacto que poderá ter esta reseña na publicación gala.
ATRACTIVO. A pesar de que Castro descoñece os criterios de selección que a guía francesa emprega para elixir os lugares que destaca, o especialista cre que a reseña sobre os petróglifos marinenses débese "á súa singularidade e aos labirintos. Petróglifos hai moitos, pero que estean acondicionados, en tan bo estado e con visitas guiadas, menos".
"Pode ser un atractivo máis porque unha vez que o visitante considera visitar o centro, pode parar en Marín e facer noite para visitar a zona se descobre que hai máis lugares de interese preto, como poden ser as praias de Mogor ou as da contorna", engadiu o arqueólogo.
Os encargados de realizar as rutas cos visitantes que se achegan ao CIP de Mogor ofrecen a opción de dar a explicación en inglés e incluso en francés. "Unha das arqueólogas do centro é galego-francesa, polo que cando chega un grupo galo, celébrano porque se poden estender e preguntar o que queiran xa ela lles vai dar unha contestación concreta na súa lingua", indica Juan Castro.
Francia atoparíase encabezando o top 3 dos estranxeiros que visitan os gravados, por diante de ingleses e portugueses. "Logo, en menor número, chegan visitantes de moitos puntos do globo. É moi grato e sorprendente que veñan persoas de países tan remotos", recoñeceu o arqueólogo.
Sen saír de España, o público está "moi repartido", pero a procedencia dos visitantes nacionais por excelencia é a Comunidade de Madrid. "A maioría son turistas que veranean na comarca do Morrazo ou en concellos limítrofes. Adoitan participar nos roteiros nocturnos", sentenciou Juan Castro.
