O Ministerio Fiscal solicita nove anos de prisión para un home acusado de convencer, con diñeiro ou caramelos a unha persoa con discapacidade psíquica e física, para que o acompañase a zonas escondidas nas que supostamente abusaba dela.
A Audiencia Provincial de Pontevedra celebrará o martes, día 15, o xuízo contra o acusado, un home maior de idade e sen antecedentes penais, con domicilio no partido xudicial de Marín. Segundo o escrito de Fiscalía, o home coñecía a "limitación das facultades psíquicas e o descoñecemento da significación das relacións sexuais" por parte doutra persoa residente na mesma localidade, maior de idade e que sofre un atraso mental moderado e un grao de incapacidade do 70%.
Durante polo menos durante os anos 2015 e 2016, en número "indeterminado pero elevado de veces, con ánimo de satisfacer os seus impulsos sexuais", buscaba á vítima, a quen convencía con caramelos ou diñeiro, para que fose a zonas escondidas da localidade ou á súa vivenda, para abusar sexualmente. Por estes feitos, o Xulgado de Instrución número 2 de Marín, no auto do 17 de xuño de 2016, xa impuxo ao acusado a medida cautelar de prohibición de achegarse á vítima, a unha distancia inferior a 100 metros, así como a de comunicarse con ela por calquera medio.
A Fiscalía considera que os feitos son "constitutivos dun delito continuado de abuso sexual non consentido, con abuso de trastorno mental e penetración". Por todo iso, solicita unha pena de 9 anos de prisión, a prohibición de que o acusado se aproxime á vítima a menos de 100 metros, tanto do seu domicilio como de calquera outro lugar no que se atope, por un tempo de 10 anos, e liberdade vixiada durante 5 anos.
En concepto de responsabilidade civil, pide que o procesado indemnice á vítima con 20.000 euros polos danos morais sufridos. Por outra banda, o Ministerio Fiscal solicita que ante "a falta de madurez da vítima" a súa declaración no xuízo oral se realice con intervención de psicólogas do Imelga, para que lle trasladen as preguntas que se lle formulen e que se empreguen medios que impidan o contacto visual entre a vítima e o procesado.
