En plena crise sanitaria e aínda aínda en confinamento, o Concello lanzou hai agora un ano a plataforma de dinamización comercial Marín en Rede. A web pretendía funcionar a modo de escaparate para os establecementos da localidade, impulsando a dixitalización do comercio de proximidade e mellorando a súa competitividade.
Un ano logo da súa creación, a plataforma conta xa con 201 locais adheridos en todo tipo de sectores e puxo en marcha as súas primeiras campañas de dinamización. Creouse nun momento de incerteza, cun investimento de 110.000 euros cofinanciados a través dos fondos Feder, á vez que se puñan en marcha axudas económicas, de exención e de bonificación impositiva.
ACTIVIDADE ECONÓMICA. Segundo o Instituto Galego de Estatística, o comercio marinense concentra o 33,8 % das empresas da localidade e a hostalería alcanza algo máis do 9,5 %, sen ter en conta ao sector primario e á administración pública. Uns datos que os sitúan como a primeira e a terceira actividade económica do municipio respectivamente.
Entre as iniciativas postas en marcha a través de Marín en Rede e co obxectivo de darlles visibilidade aos comercios, a plataforma recolle un conxunto de fichas multimedia con datos sobre o negocio, con vídeos dos seus propietarios ou a súa localización.
Apostou tamén polo uso das redes sociais para concienciar sobre a importancia de comprar no comercio de proximidade con iniciativas como #PonllesCara, que permitiu aos clientes coñecer de cerca aos propietarios dos negocios asociados á plataforma en formato vídeo.
Nesta liña púxose en marcha tamén #EmbaixadoresDoNoso, unha campaña que contou coa colaboración de diversas personalidades en distintos sectores, "que levan a marca Marín alén dás nosas fronteiras", sinalan desde o Concello.
Durante o seu primeiro ano en marcha, a plataforma impulsou tamén campañas de dinamización, como a recentemente finalizada Chega a primavera a Marín en Rede que xerou un impacto económico de 32.000 euros a través da repartición de 700 rosales decorativos entre os clientes dos comercios adheridos. Tamén a de Nadal, cun sorteo de cartóns regalo que supuxo un impacto de 82.000 euros na economía local.
A última aposta da plataforma foi a formación. Durante estes días e ata o próximo 18 de maio, 26 negocios de Marín beneficiaranse dun curso en dixitalización e posicionamento en redes sociais da man de APE Galicia e impartido pola creadora de contido e CEO de paso a Paso Agency, Natalia Maquieira.
Seguindo esta liña, o Concello atópase agora pechando os detalles para pór en marcha o programa Reactiva Marín, que ofrecerá bonos de formación individualizada de 45 horas a máis de 30 negocios da localidade, cun investimento de 80.000 euros.
Como adherirse
Formar parte de Marín en Rede é gratuíto para os negocios, que só deben encher unha solicitude online dispoñible na web da plataforma.
