O xulgado de instrución número 1 de Marín acordou o ingreso en prisión comunicada e sen fianza das cinco persoas detidas o pasado xoves pola súa presunta relación cun alixo de 500 quilos de cocaína.
A droga foi achada pola Policía Nacional nunha nave comercial situada en Coirados. Aos cinco detidos impútaselles un delito de tráfico de drogas en cantidade de notoria importancia e pertenza a organización criminal, segundo confirmou este luns o Tribunal Superior de Xustiza de Galicia.
A causa foi declarada secreta e a titular do xulgado de Marín inhibiuse en favor da Audiencia Nacional que, a partir de agora, farase cargo da instrución.
Esta operación policial, que estivo dirixida polo Greco Galicia, o grupo de resposta contra o crime organizado da Policía Nacional, en colaboración coa Brigada Central de Estupefacientes ou con axentes do Grupo Especial de Operacións (GEO) e outras unidades especializadas, supuxo a detención de cinco persoas, tres en Pontevedra e dúas en Vigo.
Os investigadores, ademais da nave de Coirados onde estaba a droga, realizaron rexistros polo menos en dous barrios de Marín, San Pedro e San Xulián, e na Avenida Marqués de Valterra, onde tamén se inspeccionaron diferentes vehículos.
Neste punto os axentes estableceron un amplo control policial, con apoio aéreo dun helicóptero da Policía Nacional, para impedir a fuga dos investigados pola súa presunta pertenza con esta rede criminal e o alixo de droga incautada.
