O partido socialista marinense critica a falta dun plan de integración de strong <>Marín co mar e o Porto. Destacan que a nova construción do Auditorio no espazo portuario supón unha barreira máis entre a vila e a ría e dificulta a recuperación da fachada marítima.
Desde a oposición critican a actuación tanto da alcaldesa de Marín, María Ramallo, como do presidente do Porto, José Benito Suárez
"Liberar terreos portuarios próximos ao centro da vila, evitar crear novas barreiras e non alonxar ainda máis o mar con recheos" son os tres eixos fundamentais que destacan desde a oposición para conseguir unha mellor unión co mar e o Porto.
Por iso, critican a recente nova concesión do antigo edificio de Ceferino Nogueira, "o Porto debe entender que a medida que foron ampliando espazo con recheos e ampliacións teñen que ir liberando tamén superficie para o seu uso público". Destacan ademais que tan só o cinco por cento do terreo que se lle gañou ao mar teñen na actualidade algún uso público, "cando noutros portos falan de acadar o 30 %".
AUDITORIO. Doutra banda, denuncian tamén a situación do futuro Auditorio, que se construirá nas inmediacións do Porto. "Colócase no sitio máis fácil pero tamén no máis sensible e importante" destacan respecto diso deste novo edificio que aseguran suporá unha nova barreira na fronte litoral da vila. "Condicionará enormemente as futuras actuacións a acometer nese espazo".
Os socialistas critican tamén que o Goberno local aprobase recentemente a ampliación do Porto á beira da terminal cuberta para a carga e descarga de materiais metalúrxicos. Unha iniciativa que aseguran comunicouse á cidadanía como un peirao para cruceristas e sinalan que se manterán á corrente "para comprobar cantos barcos veñen a descargar metal e cantos con cruceristas".
"Vemos con enorme preocupación como dende o noso Concello non existe ningún plan nin folla de ruta, para a nosa integración co mar. E o que é todavía moito peor, as decisións que acaba de tomar o PP van na dirección contraria do que necesitamos", sinalou respecto diso o portavoz do grupo da oposición, Manuel Pazos.
A alcaldesa de Marín, María Ramallo, destaca pola súa banda que a Estratexia de Fondos no ano 2015/2016 xa incluía entre os seus plans a creación dun centro cultural na zona portuaria. "Esperar a que un traballo estea encargado, organizado e canalizado para criticalo é algo que non esperabamos do grupo do Partido socialista", declarou Ramallo respecto diso.
En canto á localización do edificio, a alcaldesa sinalou que a parcela onde se situará "é a mesma parcela na que o mesmo partido socialista co seu portavoz no Goberno, é dicir estando de acordo, expuxeron, licitaron, adxudicaron e deron licenza a un centro de lecer que logo houbo que resolver porque non daban os números".
Ramallo tamén quixo animar ao PSOE para participar. "Esperabamos unha resposta, pero en positivo, para achegar" nun proxecto que está "meditado, madurado, con fondos e que empeza a dar os seus pasos".
